مجلس النواب

 

يامرحبا حيا طوال العمر نواب البلد

الي بطوا في مجلس النواب عشرات السنين

مجلس عليه البار بايوفي وعودة لاوعد

بانفتخر به لاظهر ونبات به مستامنين

ماسيبكم ماحولكم كل المصايب من عبد

من اجل يتنعم ويترسمل يعادي عابدين

سيؤن فرحانه وشاعرها من الفرحه قصد

يارب فرحة خير توصل للوطن ومواطنين

شي عندكم قرصه تقفل للمسالف والسدد

لي دوب مفتوحه ولا شي شخص عالسده امين 

شي عندكم قرصه تقفل عالمفاسد والفسد

ولا قوانين الحكومة ماتعاقب فاسدين

مادام قد جيتوا معي كلمه وسمعونا بجد

الامن ثم الامن ثم الامن يالمتواجدين

نبغى ذهب من خنكم يكفي ويكفي من رشد

او حملوا من حيت ماجيتوا وكنتم راقدين

وان كانها صوعه نقط تفتيش عاصدها عصد 

والمخرجه ماشي ولاشي خير في دنيا ودين 

الباب منه ريح احسن لطويله لانقلد

هذه صراحه ماتزعل صاحب الحق المبين

وان كان قد جيتوا مع الريس ووافدهم وفد 

باقول لريس صباح الخير ومن العايدين

النفط وين النفط وين الغاز واحوات الثمد

وين الوديعه لي ترده من كياس العايدين

وين المسيله والشرك عمالها ماله عدد

وعيالنا لاتخرجوا وسط الشوارع جالسين

وين الوظيفه لا طلع مسؤل عالكرسي قعد

يهرم وتطلع روحهم واهل الكراسي قاعدين

يامجلس النواب اسمعنا وياشاهد شهد

لا ما معاكم شي رطب برجع.لملة بامتين

كثرت غلى الاسعار هد الحيل يالنواب هد

خايف يجينا يوم مانلحق على ملح العجين

ولعاد بأكثر كلامي ان قرب ولا بعد

يوم القيامة شكوتي لله رب العالمي

إضافة تعليق
الأسم
موضوع التعليق
النص