حضرموت اليوم / سيئون / محمد
ياسين باحميد
يالله طلبناك يارب ادرك علينا بالإغاثة ** بحق سيد الأمة من قضى عمره عباده
والآل والأصحاب وكل من سار في نفس السبيل
المقدمة للكفو ما هي قط بالوراثة ** يا من في المقدم تبعّد وسيب القيادة
لا تخلي العارف مبرز وأنت في حيته نزيل
شفك لا زلت عادك متعلم حراثة ** وتطاول أهل التعلم الذين هم ريادة
وإذا حصحص الحق ثقلت لسانك واصبحته هزيل
ارجع الى التاريخ وايام الخلافة ** ما يوصل القمة إلا من عنده إرادة
يقول كلمة حق والعدل من قدام عينه ما يميل
ولا يخلي بينه وبين قومه مسافة ** يحن عليهم ويعطف ويعطيهم زيادة
وعنده بطانة أمينة ما هو من شلت ايده تشيل
لا يعرف الحقد ولا غش أو عيافة ** الكل يعمل وينتج لافوق الوسادة
صنعوا لنا أمجاد با يذكر صيطهم جيلا بعد جيل
ما اليوم ولي الأمر ما حصن عياله ** مشكوك في قوته وفي الملبس وزاده
الدخل مشبوه ذاك يوم معاد يقنع بالقليل
يداوم قدر زامين ويروح لحاله ** حد يشتغل في السوق وحد في العيادة
وحد فوق عصبي الحديقة ما بين هذا وهذا دليل
خريج في ذا الوقت ما يحرر رسالة ** ناجح وبين ايداه يحمل أحسن شهادة
وكله السبب الاستاذ يعامل الطالب وكأنه زميل
من لا عمل هيبة لنفسه يفقد مقامة ** وحتى الفصل في حصته شبه ورشة حداده
الهيبة بالأسلوب تأتي لا بالضرب أو بالصميل
كل من أدى الرسالة با ينال احترامه ** وكلين في موقعه يضاعف من جهاده
شو مستقبل الأولاد فيه أمنكم الله الجليل
والحذر تأخذ على ذا وتعطي ذا علامة ** حتى لا يسقطوا الشطار ويطلعوا البلاده
عند أكبر شهادة في الخارج يكونوا كالتماثيل
تغيرت الأحوال ولعاد شئ في مكانه ** واختل التوازن ولعاد فرح أو سعاده
الناس تترحم وتنحط على الوقت هذاك الدويل
عدّى وقتنا الزين وفارقنا زمانه ** وقت ما مثيله في حره وحتى في براده
فيه التراحم والتآخي ولا حد مبذر أو بخيل
الكل يحرص على الذمة ويصون الأمانه ** يستاهلون
المدح كله بل والثناء والإشاده
والدعاء لهم في الليل والصبح الى وقت الأصيل
والختم صلوا على من ظللته الغمامة ** حبيبنا المصطفى هو سيد الساده
والآل والأصحاب جمعا وكل من له خل أو خليل
يا وقت فيك تترفع زنابيل وتتوطى قناديل
