رعاش الله يا سيئون الطويلة يا مرتع الخلان

آه يا قهري على ذيك الأيام الدويلة

فيش يا سيئون الأنس قط ما شي مثيله

حافظ على سيئون ذي خيرة البلدان

وين السمر والأنس راح يأهل الطويلة

وين الزوامل والعدد هم وأهل الحليلة

وين المرازح لي كانت تروح وتظهر العكران

يسرون نصف الليل دحقه كلين ع رجيله

كل من سمع صوت المغني ولو مبعد يجيله

يفرط في العشاء السالي لأجل صوات الدان

مات السلا والبسط وخيم الهم بديله

وظهرت وجيه ما ترحم ربي ايش الفضيلة

على وادي الاحقاف تلطف يا عظيم الشان

ضاقت قلوب الناس والخل مزرم ع خليله

وزادوا الكذاب هم وأهل الحيل والمحيلة

والقطيعة ما بين الاخوة والأهل والجيران

رب تحفظ الوادي والفاسد الله يجزله

وكل من نيته عيفه على سيئون عجل رحيله

وعود الفرحة علينا واللطف والإحسان

ومصوك يا شعب جذمه ويا حافظ ع المسيله

منك شلوا الضوء وخلوا لنا غدراء كل ليله

الله يعين سيئون وأهلها في هذه الأزمان

ووقفت المكائن لي تسقي الزرع ونخيله

حتى المزارع في قلق يوم ما حد قط رثيله

ما له في القاع با يتلف مثنات الأطيان

وشلوك يا لبترول والديزل في قواطر طويلة

وبا عوك في سوق سوداء وكلاين يعرف عميله

ويبست غصون القضب قوت الضان والطليان

والختم صلوا على أحمد عد ما سال سيله

وآلا والأصحاب وكل ما ساروا في سبيله

ويا الله بغيت رحمه يسقي الوديان

رعاش الله يا سيئون يا مرتع الخلان