لا للقات للشاعر : محمد ياسين باحميد

أبديت بسم الله سالك ربنا

يا شافي الأمة رب تلطف بنا

أمراضنا زادت يالله بالنجاه

يستأهل البرد من ضيع دفاه

كله من الشجرة ذي لعبت بنا

خلت شباب اليوم كسر قفلنا

لا دخلت الغدرا يعمل مشتهاه

يا زارعين القات يا إخواننا

رحمه لأبناكم ولأبنائنا

أجيالنا يا أخوه يبغون انتباه

يا بائع الأخضر ليه ضيعتنا

لأنا من الملبس ولا من قوتنا

حتى السقل تاهو كلين في خلاه

القات ذا يا ناس ما هو حقنا

ولا حق الآباء ولا أجدادنا

لا حد يبت جنبه ولا يقرب قداه

حد باع ما عنده من بعد الغنى

وحد رهن داره وأمسى في عنا

وحد صمده القفر ما يلحق عشاه

سموك أبو زربين يا عود الفنا

لقًّوا قصائد فيك ناحوا بالغناء

وأنت مرض مزمن في هذه الحياة

كمّين أسرة في ضنك بعد الهنا

في العاصمة سيئون وفي بلدة سناء

كله من الرجّال إبليس أبتلاه

ياريت سقّوك بُن يا وادي بنا

بأرُض وباحمّس على محماسنا

فنجان بس قهوه يصم راسي ملاه

يستاهل البرد من ضيع دفاه